|
भित्री पानाहरु हेर्नुहोस्
|
|
|
|
|
Preview--Page 47
|
पृ.४३:
आरम्भसम्ममा पनि ममा हिचकिचाहट र अस्थिरता बाँकी नै
थियो । तर सोचें, मैले मेरो पतिबाट पूर्ण, अखण्डित र सत्य प्रेम
पाउनु छ । यसको निम्ति मैले उसको सामु नग्न रूपमा प्रस्तुत
हुनैपर्छ, उसले मलाई सम्पूर्ण चिन्नै पर्छ । अनि म उसको सामु
नांगिएँ, बेहिचकिचाहट र सुदृढताकासाथ ।
म कस्तो अनुभव गर्दै थिएँ भने मलाई निर्निमेष सुनिरहने
मेरो पति इश्वर हो, र म इश्वरको सामु अभिस्वीकार गर्दैछु ।
मैले मेरो इश्वरको सामु अभिस्वीकार गरें ।
यो अभिस्वीकारको समाप्तिमा मलाई के विश्वास थियो भने,
अब मेरो पतिको सुन्दर आँखामा केही थोपा पवित्र आँसुहरू छल्किनेछन्,
बिस्तारै उसले मलाई संसारको सबैभन्दा न्यानो, सबैभन्दा शीतल,
सबैभन्दा कोमल र सबैभन्दा बलिष्ठ उसको बाहुपाशमा बाँध्नेछ र
भरिएको गलामा भन्नेछ, "मेरो अन्वेषिके, म तिमीलाई सम्पूर्ण
पवित्रताकासाथ ग्रहण गर्दछु ।"
अनि म उसको उष्ण बाहुमा सम्पूर्ण पग्लनेछु, मेरो कायाकल्प
हुनेछ, म उसमा सम्पूर्ण समर्पित हुनेछु । एउटा एकदमै नयाँ, भव्य
र सुन्दर संसारमा हाम्रो एकात्म हृदयले प्रवेश गर्नेछ, जहाँ संशय,
अपूर्णता, अभाव, अतृप्ति, केही हुनेछैन, जहाँ मेरो आत्माको
कुनाकुनाबाट एउटै गीत प्रस्फुटित हुनेछ, "युरेका ! युरेका !"
परन्तु नियतीलाई यो स्वीकार्य थिएन ।
मैले मेरो कुरा टुंग्याएको केही क्षण पछि मेरो पतिले सोध्यो,
"त्यो मान्छेसँग तिम्रो शारीरिक सम्बन्ध थियो ?"
मानौं एक जोडदार थप्पड मेरो गालामा बज्रियो ।
मानौं एक लात्ती बज्रियो मेरो कोखमा । म तुहिएँ ।
|
|
<<मुख्य पेज
|
|
|
